Klinika Universitare Stomatologjike “Zoja e Këshillit te Mirë” është një prej klinikave më të mëdha dhe prestigjoze dentare universitare në Tiranë, e cila funksionon që prej vitit 2008 dhe ndodhet pranë Spitalit Katolik “Zoja e Këshillit të Mirë”. Prej fillimit të saj, kjo qendër funksionon si një klinikë universitare në shërbim të pacientëve dhe praktikave mësimore të studentëve të Universitetit Katolik “Zoja e Këshillit të Mirë”, Fakultetit të Mjekësisë, Programi i Studimit në Stomatologji. Qëllimi i klinikës është kujdesi ndaj pacientit me profesionalizmin maksimal. Për të arritur këtë synim, klinika dentare ndër vite ka formuar një ekip stomatologësh shumë të specializuar në degët e ndryshme të stomatologjisë dhe i ka kushtuar gjithmonë vëmendje të veçantë përdorimit të teknologjive të fundit për të ofruar gjithmonë shërbime të sigurta dhe bashkëkohore. Pranë kësaj qendre do të gjeni specialistë të Kirurgjise Orale, Ortodoncisë, mjekë stomatologë me interes të veçantë në sëmundjet paradontale, trajtimet e stomatologjisë pediatrike dhe trajtimet bazë të terapise dentare (Konservativë dhe Endodonti). Klinika ka një kabinet të avancuar të radiologjisë dentare, i cili ofron të gjithë ekzaminimet radiologjike 2D dhe 3D.
Shërbimet e ofruara janë:
- Terapi dentare (konservative-endodonci);
- Pedodonti;
- Ortodonci;
- Proteza Dentare fikse dhe të lëvizshme;
- Implantologji;
- Kirurgji orale;
- Paradontologji;
- Radiologji dentare.
Në klinikën tonë vizitat e para dhe konsulta kryhen nga një staf i specializuar për çdo fushë përkatëse. Konsulta vlerëson situatën e patologjive që mund të prekin dhëmbin (kariesin), strukturën mbështetëse të dhëmbit (paradontin) dhe mishrat (gengivën), problemet ortodontike tek fëmijët, por edhe tek të rriturit, vlerësimin për parandalimin e sëmundjeve tumorale dhe atyre sistemike si dhe mbjelljen e dhëmbëve (impiantologjinë).
