Endodontia dhe konservativa

Kariesi dentar është një proces degjenerativ i indeve të forta të dhëmbit (smaltit dhe dentinës), i shkaktuar nga bakteret e pllakës dentare.

Bakteret ushqehen me mbetjet ushqimore, sidomos me sheqernat, dhe prodhojnë acide që:

• fillimisht dobësojnë smaltin (karies sipërfaqësor, shpesh pa dhimbje)
• më pas depërtojnë në dentinë, ku procesi përparon më shpejt
• në fazat e avancuara arrijnë pulpën dentare (nervin), duke shkaktuar inflamacion dhe dhimbje (pulpit)

Kariesi ndikohet nga disa faktorë, si:

• prania e baktereve në pllakën dentare
• konsum i shpeshtë i sheqerit
• higjiena orale jo e rregullt
• predispozicioni gjenetik
• mosha dhe cilësia e smaltit

Shpesh kariesi fillon pa simptoma. Shenjat që duhen marrë seriozisht janë:

• ndjeshmëri ndaj të ftohtit, të nxehtit ose të ëmblës
• njolla të bardha ose të errëta në dhëmb
• ushqim që ngec vazhdimisht në të njëjtin vend
• dhimbje gjatë përtypjes
• dhimbje spontane (shenjë e kariesit të thellë)

Në klinikën tonë kryhen trajtime restauruese të plota, si:

• Mbushjet estetike (kompozit)
  Mbushjet realizohen me materiale moderne, me ngjyrë natyrale, duke rikthyer formën dhe funksionin e dhëmbit.
• Inlays / Onlays
  Janë restaurime indirekte (të punuara me precizion), të rekomanduara kur dëmtimi i dhëmbit është më i madh se sa një mbushje klasike.
• Silanizimi i dhëmballëve
  Një procedurë parandaluese shumë e rëndësishme, sidomos tek fëmijët, që mbron dhëmballët nga kariesi duke mbyllur brazdat e thella.
• Faseta me kompozit (Bonding estetik)
  Fasetat me kompozit janë një zgjidhje estetike moderne dhe minimalisht invazive, që përdoret për:
  • përmirësimin e formës së dhëmbëve

• • korrigjimin e hapësirave (diastema)
  • harmonizimin e buzëqeshjes
  • korrigjimin e defekteve të vogla të ngjyrës
    
    

Kjo procedurë shpesh realizohet pa dhimbje dhe në shumë raste pa nevojën e preparimit të madh të dhëmbit.

Endodontia, nga vetë kuptimi i fjalës “endodont” (brenda dhëmbit), është dega e stomatologjisë që merret me indet e buta të dhëmbit (pulpën), patologjitë e lidhura me to dhe trajtimin përkatës.

Trajtimi endodontik (terapia e kanalit) është i nevojshëm kur pulpa:

• inflamohet (pulpit)
• nekrotizohet (vdes)
• infektohet dhe shkakton abses dentar
  
  

Shkaktarët kryesorë janë:

• kariesi i thellë
• trauma dentare
• mbushje të vjetra ose të dëmtuara
• infeksione të përsëritura

Terapia endodontike konsiston në:

• heqjen e pulpës së inflamuar ose nekrotike
• pastrimin dhe dezinfektimin e kanaleve rrënjësore
• formësimin e sistemit kanalar
• mbushjen e kanaleve me materiale biokompatibile
• rikonstruksionin e dhëmbit me restaurim të përshtatshëm (mbushje, inlay ose kurorë)

Qëllimi është shpëtimi i dhëmbit natyral dhe eliminimi i infeksionit.

Në klinikën tonë, trajtimet endodontike kryhen nën anestezi dhe me protokolle moderne, për rezultate sa më të sigurta dhe afatgjata.

Përdorim:

• instrumente nikel-titanium (p.sh. MTwo)
• lokalizator apeksi për matje precize
• izolim me diga (rubber dam) për sterilitet maksimal
• kontrolle radiografike gjatë procedurës
• teknika të standardizuara për dezinfektim të plotë
  
  

Kjo na mundëson një trajtim të saktë, të sigurt dhe me komfort maksimal për pacientin.