Në ditën e 8 Marsit, Fondacioni Zoja e Këshillit të Mirë, Spitali Katolik dhe Universiteti organizuan takimin e përvitshëm në nder të Ditës Internacionale të Gruas, duke promovuar ndërgjegjësim dhe reflektim mbi këtë ditë të veçantë.
Përpara të pranishmëve në sallë përshëndeti Presidenti i Fondacionit, fr. Ruggero Valentini. Ndërsa ky takim në dritat e projektorit vendosi në mënyrë të veçantë gra, të cilat kanë ndjekur një rrugë të vështirë në karrierë dhe tregojnë sfidat e tyre përgjatë jetës për të ndërtuar kështu histori suksesi, siç është Prof. Asoc. Malvina Hoxha, Dr.Inida Ruli Kirurge, shkrimtarja Dr.Mimoza Agastra.
Në fjalën e saj Dr. Inida Ruli, Mjeke kirurge pranë Spitalit Katolik Zoja e Këshillit të Mirë theksoi që gratë janë nënvlerësuar historikisht, veçanërisht në vendin e punës, pavarësisht nga të gjitha talentet, arritjet dhe aftësitë e tyre. Është e rëndësishme ti japim grave respektin, dukshmërinë, njohjen që meritojnë dhe mbështetjen që u nevojitet, pasi atyre u duhet të bëjnë punë dyfish apo trefish që të trajtohen njësoj si burrat. Mesazhi i saj ishte: me bindje, këmbëngulje dhe angazhim mund tia dalë çdo grua, njësoj siç ia dola dhe unë të ndjek ëndrrën time.
Duke promovuar e vlerësuar gratë që kanë bërë përparime të mëdha, inkurajojme gratë e tjera që të ndjekin aspiratat e tyre për karrierë, duke e ditur mjaft mire sa e mundimshme është ti kushtosh vëmendje punës, familjes dhe jetës shoqërore.
Në mënyrë simbolike për të treguar mbështetje ndaj çdo gruaje u ndërmor një iniciativë solidariteti dhe kujdesi për gratë në nevojë e vështirësi. Fondet ekonomike modeste te mbledhura iu dhuruan grave në nevojë, pjesë e shoqatës “Linja e konsulencës për gra dhe vajza viktima të abuzimit”, të cilat ishin në mesin tonë ditën e 8 marsit . “Aiutare il prossimo e sorridere alla vita”, ky ishte slogani frymëzues i iniciativës sonë.
Mirënjohje për të gjitha nënat, motrat e gratë që me dashurinë, forcën dhe energjinë e tyre pozitive luftojnë çdo ditë për zhvillimin e shoqërisë, dhe në mënyrë të vecantë për të gjitha gratë në shëndetësi për kontributin e tyre të paçmuar!
