Angiografia, investimi më i fundit teknologjik i Spitalit Katolik, vijon aktivitetin e tij klinik duke shënuar një sukses në një ndërhyrje komplekse. Eksperienca e Mjekëve dhe pajisja bashkëkohore mundësoi trajtimin e një patologjie të rëndë koronare, duke ofruar një zgjidhje minimale invazive për një rast që përndryshe do të ishte i vështirë për t’u trajtuar.
Falë kësaj procedure të avancuar, mjekët tanë arritën të trajtojnë me sukses një patologji komplekse koronare tek një pacient i cili në të kaluarën i ishte nënshtruar një operacioni by-pass të aortës dhe arterieve koronare. Bllokimi prekte një pikë delikate të trungut komun, enës më të rëndësishme për mire-funksionimin e zemrës.
Ndërhyrja, e cila zgjati rreth 30 minuta, u realizua duke përdorur teknikat dhe standartet e indikuara sipas protokolleve specifike. Kjo mundësoi hapjen e arterieve në mënyrë precize dhe të sigurt. Rezultati ishte i menjëhershëm: qarkullimi i gjakut në enët koronare u rikthye normalisht dhe pa asnjë lloj komplikacioni. Suksesi i vërtetë u pa në orët në vijim: pacienti u përmirësua shpejt dhe u kthye në shtëpi në gjendje të mirë shëndetësore vetëm 24 orë pas ndërhyrjes.
Ky rast dëshmon edhe një herë se si teknikat minimale invazive, të mbështetura nga teknologjia bashkëkohore si angiografi i ri, ofrojnë sot zgjidhje efikase edhe për sëmundjet më të ndërlikuara të zemrës. Përfitimet për pacientët janë të qarta: siguri e lartë, qëndrim shumë të shkurtër në spital dhe kthim të shpejtë në jetën e përditshme.
